O xerente do Sergas en Lugo, Ramón Ares, informou este luns de que o cribado realizado en Guitiriz arroxou tres positivos entre as 506 mostras procesadas.
As probas, co obxectivo de localizar asintomáticos, incluíron un cribado dirixido ao sector servizos, ademais de test no colexio e a todos os usuarios do centro de día.
CEPA BRITÁNICA. A alcaldesa de Guitiriz, a socialista Marisol Morandeira, apuntou este luns que a cepa británica do coronavirus pode estar detrás da "alta incidencia" da pandemia no municipio.
En concreto, os 123 positivos rexistrados nos últimos 14 días neste concello sitúan a incidencia acumulada por encima dos 2.000 por cada 100.000 habitantes. "Comezamos a semana con 123 casos activos, que nos confirman desde o centro de saúde, e isto non para de subir", advertiu a rexedora de Guitiriz.
E é que a alcaldesa ten claro que ao longo desta semana os contagios "seguirán subindo" debido a dous cribados que se realizarán no instituto e en el CEIP Santo Estevo de Parga: "Estamos a falar de menores, e onde aparece un menor o normal é que dean tres ou catro positivos máis".
Ademais, engadiu que nas unidades de convivencia a xente non usa máscara, polo que "é normal que aparezan máis casos". "Hai que contar que esta semana vaia subindo (a incidencia)", vaticinou.
Morandeira tamén aludiu á variante detectada en Reino Unido como responsable desta subida "polo contraste de distintas mostras que parecen apuntar que parte dos contaxios veñen desa cepa, que é máis contaxiosa". Insistiu na alta incidencia que deixa a mutación do virus "polo xeito de como estourou todo, con eses contactos tan rápidos en menos de cinco días" que puxeron en máis do centenar o total de casos: "Isto fai ver que poida estar detrás".
Finalmente, a alcaldesa de Guitiriz explicou que os seus veciños poden estar autoconfinándose e, así, apostila que xa a semana pasada "a xente andaba menos polo centro urbano e había menos actividade".
