Un camión de transporte de pensos quedou, ao redor das oito da tarde deste mércores, atrapado nunha cuneta dunha pista local no lugar das Peniñas, na parroquia guitiricense de Parga, tras sufrir unha saída de vía.
O camión meteuse na cuneta pola marxe esquerda e a presenza de terra branda nesta impediu que volvese incorporarse ao camiño, polo que o condutor, que resultou ileso, requiriu axuda dos servizos de urxencia.
Ata o lugar desprazáronse efectivos de Protección Civil de Guitiriz e da Garda Civil de Tráfico, así como outro vehículo ao que foi transferido o alimento que transportaba, para facilitar a súa retirada do lugar. Con todo, non foi posible sacalo da cuneta, polo que está previsto que na mañá deste xoves acuda maquinaria máis adecuada para proceder á súa retirada.
A pista local na que o camión está atascado permanecerá cortada ao tráfico ata que o vehículo pesado sexa retirado. Xa se deu aviso ao transporte escolar, que a usa habitualmente, para que na mañá do xoves realice un traxecto alternativo.
