Os veciños da Pastoriza e de Meira mostraban este martes o seu gran pesar tras coñecer a tráxica noticia do falecemento de Jesús Paz, o dono da funeraria Paz, situada no barrio pastoricense de Paraxes, onde tamén rexentaba a florería Jesma. O empresario, de 58 anos, era unha persoa moi coñecida en ambas as localidades. Tamén tiña un taxi e era o dono do tanatorio San Roque, situado no veciño concello de Meira.
O falecido, separado desde hai moitos anos e con dous fillos, apareceu o martes pola mañá nun alpendre da súa propiedade. Aínda que a Garda Civil abriu unha investigación, descártase a intervención de terceiras persoas.
Tras practicarlle a autopsia, será trasladado ao tanatorio San Roque e este xoves será o enterro ás 17.00 horas. Haberá misa na igrexa de Meira e será incinerado na intimidade familiar.