Un home de 84 anos de idade, J.G.G. e unha muller, con iniciais R.F.P., aceptaron onte unha condena de dous anos de prisión cada un como autores dun delito continuado de falsidade en documento mercantil en concurso medial cun delito continuado de estafa. O octoxenario recoñeceu que se fixo pasar por outras persoas e asinou poderes ante notario que logo a acusada utilizou para conseguir préstamos hipotecarios.
Segundo recóllese no escrito de acusación do ministerio fiscal, o acusado falsificou a firma de varias persoas en distintas notarías de Vilalba e Guitiriz ao longo dos anos 2011 e 2012, polo menos en catro ocasións. O home imitaba as rúbricas e facíase pasar por outros coñecidos para outorgar poderes notariais a favor da acusada. Posteriormente, con estes documentos, a muller chegou a solicitar ata tres préstamos hipotecarios, por importes de 77.000, 39.000 e 43.000 euros, constituíndo as hipotecas sobre inmobles propiedade das persoas polas que se facía pasar o acusado.
Ademais, o 20 de febreiro de 2012, o octoxenario fíxose pasar por outro home nunha notaría e outorgou testamento -imitando a firma desa persoa- nomeando herdeira universal á acusada. O home polo que se fixo pasar faleceu tan só dous días máis tarde.
Por estes feitos, o ministerio fiscal solicitaba inicialmente cinco anos de prisión para cada un dos acusados, así como sendas multas de 3.960 euros. Ademais, pedía que ambos indemnizasen aos afectados nas cantidades defraudadas, cos intereses legais correspondentes. Finalmente, as partes chegaron a un acordo e non houbo xuízo.
