O conselleiro de Economía, Emprego e Industria, Francisco Conde, destacou este venres que a Xunta de Galicia incluirá nos seus Orzamentos para 2020 unha partida de 15,4 millóns de euros para o polo aeroespacial de Galicia co obxectivo de seguir "impulsando" o desenvolvemento do sector.
"Unha oportunidade para seguir apoiando proxectos de I+D+i que as multinacionais están a realizar en Rozas en colaboración con máis de 30 pemes, universidades e centros de coñecemento galegos", sinalou Conde durante unha visita a Viveiro da que informou a Xunta nun comunicado.
Deste xeito, segundo indica a consellería, os orzamentos autonómicos para o próximo ano apostan tanto pola innovación como pola formación co obxectivo de crear emprego e contar cun tecido empresarial máis diversificado e competitivo.
A Xunta recordou que o polo aeroespacial de Galicia, que conta coa colaboración de tres socios de referencia internacional como son Indra, Babcock e Boeing, permite a Galicia desenvolver unha iniciativa innovadora coa que gañar en diferenciación.
Así, indicou que esta industria permite abrir novos mercados nacionais e internacionais, mellorar a competitividade do tecido empresarial galego e xerar crecemento económico facilitando sinerxías e novas capacidades industriais.