A Asociación de Veciños de Vilapedre, en Vilalba, convocou por segundo ano o concurso de iluminación do Nadal na parroquia e foi a proposta de Casa Alfonso a que conseguiu alzarse como a gañadora.
Cun total de 478 votos recollidos a través das reaccións na páxina de Facebook, estes veciños do barrio de Porto de Bois conseguiron o primeiro posto, que se traduce en 25 puntos. O segundo lugar foi para Casa Pedriñas, con 422 apoios e 20 puntos; o terceiro para Casa Divino, con 75 votos e 15 puntos; o cuarto para Casa Edelmira, que logrou 66 reaccións en Facebook e dez puntos; e, para rematar, Casa Nidito tivo 40 votos e cinco puntos.
Así mesmo, desde a entidade indican que o xurado —composto por membros da directiva— decidiu "por unanimidade" outorgar a todos os participantes a máxima puntuación, "pola ilusión amosada e pola colaboración para conseguir que Vilapedre volvese brillar un ano máis polo Nadal".
Todos eles recibiron un premio nos seus domicilios "e haberá un agasallo para todos os veciños que adornaron o exterior dos seus fogares", engadiu o colectivo.
