O Concello de Vilalba asumirá a partir do próximo curso a xestión do servizo de madrugadores, o cal se pasará a prestar nos propios centros educativos. Este tema abordarase no pleno ordinario que se celebra este xoves, de forma telemática, a partir das 17.00 horas.
Ata o curso 19-20 –no último, o servizo ofrecérono directamente as ludotecas–, eran as propias asociacións de nais e pais de alumnos as que xestionaban este importante servizo para a conciliación familiar e que se realizaba nos centros de lecer infantil da localidade, coa colaboración económica do Concello, que axudaba a financiar o transporte posterior desde estes a os colexios. Na súa orixe, era o Concello o que xestionaba este traslado, pero houbo que cambiar a fórmula xa que non se axustaba á legalidade á hora de contratar os autobuses.
O Concello asume agora este servizo, o cal se sacará a licitación unha vez que se aproben o xoves en pleno as bases e as tarifas. As familias interesadas poderán inscribir aos seus fillos os cinco días da semana, o que suporá un custo de 40 euros ao mes, ou días soltos, cun prezo de seis euros diarios.
O custo da prestación roldará os 60.000 euros, segundo indicaron desde o goberno local. Os ingresos polas taxas dos usuarios, no caso de cubrirse todas as prazas, roldarán os 24.000 euros, asumindo as arcas municipais os 36.000 restantes.
O servizo de madrugadores realizarase a partir de agora nas propias instalacións de tres centros educativos: a Escola de Educación Infantil (EEI) de Vilalba, o Ceip Manuel Mato Vizoso e o Ceip Antonio Insua Bermúdez. O horario será de 7.30 a 9.30 horas.
A previsión do Concello vilalbés é que uns 60 nenos e nenas de educación infantil e primaria benefíciense desta iniciativa para a conciliación o próximo curso –fíxose unha sondaxe previa entre as familias dos alumnos dos tres centros–.
"Temos que atender a crecente demanda das familias dos centros de educación infantil e primaria do noso concello, xa que o servizo constitúe unha peza crave para a conciliación da vida familiar e laboral, facilitando así a incorporación de homes e mulleres ao mercado laboral en igualdade de condicións", indicou Marta Rouco, concelleira de servizos sociais.
Engadiu que o Concello cumpre "cun dos compromisos deste goberno, adquirido principalmente coas anpas, asumindo a xestión directa deste servizo público".
ORDE DO DÍA. Vilalba Aberta levará dúas mocións máis e o PP outra moción e catro preguntas.
