O Concello de Vilalba deseñou un proxecto, que suporá unha investimento de 48.380,63 euros, para ampliar e mellorar o parque infantil localizado na parte alta da Praza da Constitución, nas inmediacións da casa consistorial.
Crearase "un espazo adaptado a todas as idades e necesidades de nenas e nenos", destacan desde o goberno local, incidindo en que a súa idea é apostar por colocar "xogos inclusivos e adaptar esta zona á normativa vixente", a través dunha intervención que pretende suprimir "elementos de risco" e habilitar "novos xogos homologados".
O proxecto de ampliación supón integrar na área de xogo xa existente unha zona verde anexa ao actual recinto, que se aproveitará para instalar un complexo de xogos múltiple e inclusivo, "adaptado a un máximo de 52 nenos de maneira simultánea", segundo recolle a documentación. Colocarase tamén un xogo de plataformas que poderán usar nenos maiores dun ano e retirarase o actual balancín contiguo a unha palmeira, polo mal estado que presenta e a súa falta de uso.
A actuación inclúe tamén a renovación e colocación dun pavimento amortiguador. O actual, de caucho, está deteriorado, segundo apuntan desde o goberno local, polo que se substituirá por outro de absorción de impactos, que tamén se empregará na nova superficie da zona de lecer, mantendo en ambos os casos as mesmas características de deseño e cor que ten agora.
Instalarase pavimento amortiguador e recolocarase o valado actual
Para ampliar o parque será necesario recolocar o actual valado perimetral. Así, retirarase o existente na zona norte, que se recolocará como parte do novo peche perimetral que valará toda a área de xogos unha vez completada a obra. Do mesmo xeito que co novo chan, respectarase a súa estética multicolor.
A ampliación fará necesario demoler unha escaleira de dous metros de longo e cinco banzos, coa previsión de reconstruíla "en pezas macizas de granito nacional abuxardado", tal e como se contempla no proxecto, que tamén inclúe a colocación de tres bancos de madeira, repartidos polo parque infantil para facilitar o descanso tanto dos menores como dos seus acompañantes. Serán similares aos xa existentes baixo a pérgola, de modelo Iroko, sen respaldo e de 4,5 metros de longo.
"Encargamos este proxecto porque seguimos a liña de xerar espazos pensando nas persoas e non desenvolvemento didáctico e creativo das nenas e dos nenos", destacan desde o Concello.
