O décimo cuarto FIV de Vilalba pechouse este domingo cos concertos de Petit Pop e a banda de música local no auditorio e coa vista posta no 2022, cando o festival regresará á súa data habitual, a finais de abril.
Así o confirmou o domingo a edila de cultura, Vanesa Siso, que afirmou que o Concello empezará a traballar "sobre esa data, pendente do que vaia ocorrendo co covid, que esperemos sexa positivo".
Tras case dous anos e medio da última edición, Siso destacou que o FIV foi "un espazo de reencontro, coa música en directo, co público e coa vida" tras un ano "tremendamente duro para todos".
"Ás veces as crises traen oportunidades, e presentamos un formato FIV moi coidado, con propostas novas que veñen para quedar" e que foron "moi ben acollidas polo público", como o cambio de localización para gañar espazo, o segundo escenario emerxente e actos para o público familiar.