O Concello das Pontes acondicionará o carballo centenario de Xaquín das Herbas que caeu o pasado martes para volver colocalo na zona, nas proximidades da ponte romana, como "elemento de recordo", tal e como confirmou o mércores o rexedor, Valentín González Formoso.
A histórica árbore, cuxo tronco estaba oco debido ao impacto dun raio hai varias décadas, foise secando e esborrallouse este martes e acabou no río Chamoselo.
O carballo, situado na rúa que leva o nome de Xaquín das Herbas –un misterioso personaxe que viviu varios nas Pontes e que está enterrado no cemiterio das Campeiras pero do que pouco se sabe–, forma parte do patrimonio natural e inmaterial do pobo, xa que son moitas as historias que se manteñen vivas na memoria colectiva. Algúns recordan que foi o agocho de moitos nenos do barrio, pero tamén a morada do propio Xaquín das Herbas.
O goberno local, que o ano pasado homenaxeou á figura de Xaquín das Herbas cun mosaico de fotos na parada de autobús do Poboado do Barreiro dentro do proxecto As Pontes en Pezas, ten previsto retirar o venres o carballo do río por cuestión "de seguridade".
Despois, a árbore trasladarase á nave da empresa local Adera, situada na área industrial de Cruz das Cabezas, e esta será a encargada de darlle o tratamento necesario á madeira para poder proceder a recolocar a árbore, ou polo menos parte del, no mesmo lugar "como elemento ornamental e de memoria".
"Dinnos que hai que esperar para poder acondicionalo porque ten que secar máis para poder tratar a madeira", confirmou o rexedor pontés, que destacou a importancia de recuperalo para manter un elemento que forma parte da intrahistoria da localidade.
