O equipo de goberno das Pontes aprobou este mércores en pleno, nunha sesión extraordinaria urxente, a concesión dunha subvención nominativa ao Club Deportivo As Pontes por importe de 200.000 euros para financiar as súas actividades deportivas, así como a firma dun convenio de colaboración coa entidade.
O PSOE avalou esta decisión, que saíu adiante só cos seus votos a favor, na longa traxectoria e a relevancia social que ten o CD As Pontes na localidade, destacando os seus máis de 600 socios, os ao redor de 200 menores que suma a súa canteira ou a aposta polo deporte feminino, cun equipo sénior desde hai case unha década.
BNG e Xuntos polas Pontes –o edil do PP non puido asistir ao pleno polo pouco marxe na convocatoria– xustificaron a súa oposición a esta axuda ao considerar que os fondos non se destinan a promocionar o deporte base –máis da metade vai ao primeiro equipo, o que non perciben unha influencia positiva directa na economía local.
O BNG recorda que desde 2011 o CD As Pontes recibiu 1,5 millóns en axudas do Concello, ademais das achegas de patrocinadores, e que aínda así ten máis de 300.000 euros de débeda e desde Xuntos lamentan que se promocione un deporte por encima doutro.
UNANIMIDADE. O pleno si validou por unanimidade a modificación puntual das normas subsidiarias municipais para adecuar a normativa urbanística á realidade existente nunha parcela da Avenida da Habana, 129-137, utilizada como aparcadoiro desde hai anos. O cambio debe ser agora ratificado pola Xunta.
