O Concello de Guitiriz solicitou o recoñecemento oficial por parte da Xunta do tramo entre Vilalba e Betanzos como parte do Camiño do Norte de Santiago. A reclamación parte dun acordo plenario aprobado na última reunión do consistorio de Guitiriz, que pide a recuperación oficial deste traxecto.
A documentación remitida á Administración autonómica polo goberno de Guitiriz recolle a investigación realizada polo Grupo de Amigos do Camiño do Norte e a resposta afirmativa do Cabildo da Catedral.
Este órgano determinou que "non cabe dúbida" de que o tramo formaba parte do antigo Camiño Norte, polo que daba o seu visto e prace a conceder a Compostela aos peregrinos que realicen esta ruta e cumpran cos requisitos.
Tras esta resposta, segundo explica o Concello, os oito alcaldes dos municipios polos que trancurre este tramo reuníronse a principios de outubro para asinar unha declaración a favor da conservación e sinalización da ruta.
Agora, pretenden que o Goberno autonómico recoñeza de xeito oficial o traxecto e o incopore mediante un decreto á ruta do Camiño do Norte, tamén coñecido como Camiño Real.
