O Concello das Pontes está a ultimar a construción dunha pista multideportiva na contorna do lago, unha actuación executada con fondos propios e que busca seguir ampliando "o completo aproveitamento deportivo" deste enclave que acolle ao longo do ano diversas citas e eventos de carácter local, nacional e internacional.
A instalación, para a que se destinou un orzamento total de 47.723,56 euros, contará cun perímetro de 41x34 metros e unha superficie cunha capa nivelada de 40 centímetros de espesor de area fina.
"Estas características permiten que se adecúe á normativa establecida para todas as disciplinas deportivas que se pretenden realizar sobre este terreo de xogo", explican desde o goberno local, dando máis detalles sobre a súa utilización.
Así, esta pista, que se localiza no espazo sur da zona recreativa do lago, foi creada "co obxectivo de que sexa compatible coa realización doutras actividades e eventos deportivos que xa se veñen disputando anualmente" neste emprazamento, permitindo ademais "unha correcta interrelación coas persoas usuarias da praia".
"A execución desta instalación deportiva de area responde á demanda de diferentes entidades deportivas de contar cun espazo ao aire libre que permita desenvolver competicións e adestramentos destas disciplinas sobre area. Rugby, voleibol, balonmán ou fútbol son os deportes aos que está dirixido principalmente este novo espazo", indican desde o goberno municipal, avanzando que a súa inauguración realizarase moi pronto.
EVENTO. E é que esta nova área multideportiva do lago, situada moi preto da praia que loce este verán e por primeira vez na súa historia a bandeira azul, será o escenario no que se celebrará o próximo fin de semana, os días 6 e 7 de agosto, a Beach Rugby 5 Vila dás Pontes.
Neste novo torneo, que contará tanto con categoría feminina como masculina, daranse cita máis de 250 deportistas procedentes de distintos puntos a comunidade, ademais doutros lugares de España, Portugal e Francia.
