Tras a resaca das protestas do mércores e máis de 1.200 quilómetros realizados, o comité de crise fixo un balance "positivo" da xornada de folga xeral e a marcha a Madrid pero non descarta novas accións.
Os camioneiros, que xa chegaron todos o xoves, continúan co peche nos concellos das Pontes e Ferrol. "A impresión que traemos de Madrid é boa, porque vemos que todo o mundo tira e hai un camiño cara adiante. Cando fomos non esperabamos traer nada, sabiamos que iamos facer ruído, pero ao final das reunións saíron compromisos", explica o presidente do colectivo de transportistas, Manuel Bouza, que aínda así matiza: "Imos seguir encerrados nos concellos e coas protestas. E se hai que ir a Bruxelas, tamén iremos".
"O balance en termos xerais é positivo, o que se buscaba era unha relevancia mediática, que se conseguiu, e lograr o apoio dos distintos grupos políticos, que tamén se conseguiu", valorou a concelleira de industria, Ana Pena, tras a reunión do comité de crise, que xa convocou outra para o luns ás 10.00 horas.
ESCRACHE. "O pobo respondeu case ao 100% coa folga e iso evidencia o apoio dos veciños", expresou Ana Pena, pero o xoves varias decenas de veciños concentráronse fronte a unha oficina bancaria, un dos poucos negocios que abriu ao público o día da folga. A protesta durou uns 15 minutos, tras as desculpas da dirección da entidade.
O mesmo día que está convocada a reunión do comité de crise, o luns, prevese que Endesa inicie as probas para buscar unha alternativa con carbón e biocombustibles que lle permita operar e o Idae desprazará a un técnico.
"As probas serán entre o luns e o venres e entendemos que a partir de aí volverannos a chamar do ministerio", indicou a concelleira pontesa, que asegurou que haberá máis protestas pero que previsiblemente non se convocarán accións a semana das probas para "non cargar aos veciños con convocatorias diarias".
