O Concello de Cospeito acaba de acometer o proxecto de mellora do parque infantil da localidade de Feira do Monte, no que destaca a instalación dunha gran cuberta para que esta dotación póidase gozar incluso cando as condicións meteorolóxicas non acompañen, sendo, ademais, a primeira que se instala para este fin na comarca chairega.
O orzamento para estas obras superou os 51.000 euros, dos que o 70%, 36.243,74 euros, foron financiados a través dunha subvención da Vicepresidencia Primeira e Consellería de Presidencia, Xustiza e Turismo da Xunta de Galicia. O resto sufragouse con fondos municipais.
Os traballos centráronse en colocar unha cuberta de policarbonato traslúcido a unha auga, cunha pendente do 10% e que cobre unha superficie duns 200 metros cadrados. Está formada por cinco pórticos paralelos entre si, separados por unha distancia de cinco metros entre eixos. A altura libre mínima é de 3,20 metros nos laterais e de 3,60 na zona central.
Tamén se procedeu á renovación de todos os xogos e á substitución do pavimento de caucho por outro novo. "Tingamos que reformar este parque porque vos xogos tingan xa bastantes anos e para que cumpliran coa normativa correspondente", explicou o alcalde, Armando Castosa.
Engadiu que a cubrición do parque permitirá "que se poida utilizar con independencia dá situación meteorolóxica" e que supón "unha medida de apoio ás familias e de impulso demográfico".
O rexedor tamén sinalou que as obras están terminadas, pero que o parque aínda non está operativo e inaugurarase nas próximas semanas.
Recordou ademais que no municipio hai outro parque, na localidade de Muimenta, cuxa mellora será a próxima actuación que se realizará neste tipo de infraestruturas.
Doutra banda, proximamente inaugurarase tamén o novo parque infantil que se habilitou na nova fase de ampliación do polígono de Muimenta, cuxas obras están xa case terminadas. Nel, ademais de xogos dotouse tamén de mesas e bancos e recuperouse parte dunha antiga vivenda.
