O centro de atención a persoas con patoloxía dual que constrúe a Fundación de Dano Cerebral (Fudace) en Castro de Ribeiras de Lea está a piques de ser unha realidade e a previsión é que abra as súas portas antes de que finalice o ano. O proxecto, pioneiro en Galicia, rolda un orzamento total de 1,8 millóns de euros e as obras, que empezaron a executarse setembro de 2017, están xa na súa fase final.
O delegado da Xunta en Lugo, José Manuel Balseiro, visitou este venres, xunto ao presidente de Fudace, Luís Abelleira, e responsables do GDR Terra Chá e o alcalde de Castro de Rei, Francisco Balado, as obras deste centro, que ofrecerá un total de 16 prazas.
"O centro está montado en módulos para que a ampliación sexa fácil. E co mesmo módulo de servizos que xa hai poderíase montar outro para 16 camas máis", explicou Abelleira, que fixo de guía por unhas instalacións modernas ás que a Xunta, a través do GDR Terra Chá, concedeu unha axuda de 200.000 euros.
"Por parte do GDR é fundamental apoiar este tipo de iniciativas", expresou José Ulla, o vicepresidente da entidade
"É un centro pioneiro e que supón moito para provincia de Lugo", expresou Balseiro, que se mostrou gratamente sorprendido coas posibilidades que ofrecen as instalacións. Ademais, destacou que a Consellería de Medio Rural xa colaborou en ocasións anteriores con Fudace, con outras dúas axudas de 200.000 euros cada unha para o centro de dano cerebral de Fudace e para servizos que agora poderían ser comúns como o ximnasio e a piscina.
