Din que os cogomelos ou che gustan ou os odias, pero que teñen un público fiel. E iso demostrouse este domingo en Castro de Rei, onde máis dun centenar de persoas participaron na celebración da Xornada Micolóxica de Amigos da Feira, que cumpriu este ano dúas décadas de historia honrando un dos produtos máis típicos do outono.
"A cita mantense, temos xente que sempre repite e co tempo xa hai expertos en cogomelos", explicaba Fran Rielo, o presidente dun colectivo que suma 180 socios e que promove citas clave no calendario local como a Xornada Micolóxica ou a Festa da Malla de Castro de Rei.
A xornada arrincou cunha saída ao monte, na que participaron unha trintena de persoas, e continuou cunha degustación no comedor do colexio, onde os asistentes puideron gozar de pizza con xamón, queixo e macrolepiota, fabas con ameixas e boletus, tenreira á xardineira con níscalo e unha guarnición de pasta con níscalos, boletus, bacon, xamón e nata e a maiores as sobremesas.
"En total cociñáronse uns 20 quilos de cogomelos", indicou Jesús Blanco, o micólogo de Os Bolouros, de Foz, que fai tanto de experto na cociña como na montaxe dunha exposición sobre a diversidade de cogomelos que un se pode atopar nos montes chairegos.
"A tempada está sendo irregular, coma estes últimos anos. Hai unha pequena floración en setembro, un outubro seco e quente con nula aparición e vén toda de golpe en novembro e decembro. Chega máis tarde pero está sendo de boa calidade", dicía o experto, que recordou que hai que coñecer as distintas variedades para saber o que comer. "Cando empezamos eramos moi pouquiños, pero mantense, e non é fácil manter algo así tanto tempo", valorou.
