Os municipios de Castro de Rei e Outeiro de Rei únense para impulsar o turismo activo a través dunha nova ruta de bicicletas todoterreo (BTT) que enlaza ambos os municipios nun percorrido de ao redor de 90 quilómetros. A Xunta destinou a esta actuación case 40.000 euros do Fondo de Compensación Ambiental, que ambos os concellos solicitaron para a liña de concorrencia competitiva mediante o sistema de xestión compartida.
O proxecto inclúe a colocación de frechas indicativas de dirección para marcar o trazado e paneis informativos nos principais núcleos de poboación e nos distintos accesos a unha ruta que serve para dar a coñecer o patrimonio, espazos naturais e símbolos de cada un dos concellos, como é o caso do castro de Viladonga, en Castro de Rei. En Outeiro de Rei, ademais, aproveitouse a aplicación coa que xa conta o concello para incorporar o trazado e poder seguilo co GPS.
"Esta actuación conxunta de dous concellos é dos mellores exemplos de que a xestión compartida é o mellor camiño para poder optimizar recursos e mellorar as condicións de vida de todos os cidadáns", destacou a directora xeral de Administración Local da Xunta, Marta Fernández-Tapias, na visita que realizou a ambos os concellos, á vez que incidiu na importancia deste tipo de iniciativas para "fomentar o turismo e mellorar a actividade económica".
"Agradecémoslle á Xunta o apoio para este tipo de actuacións, porque dende ou punto de vista turístico ofrécenos posibilidades de desenvolvemento no futuro. É un recurso máis que imos utilizar entre dous concellos limítrofes e amigos", expresou o rexedor de Outeiro de Rei, José Pardo Lombao. Ao que o alcalde de Castro de Rei, Francisco Balado, engadiu: "É unha forma de impulsar o turismo, dar a coñecer o patrimonio e unir dous concellos cunha ruta que no noso caso era algo moi demandado polos grupos que fan BTT e polas asociacións".
O investimento da Xunta nos últimos anos a través de subvencións da Vicepresidencia supera en Outeiro de Rei os 675.000 euros e suma máis de 250.000 en Castro de Rei e ambos os municipios xa se presentaron de forma conxunta ás axudas do Fondo de Compensación Ambiental noutras ocasións. A convocatoria para este ano conta cun orzamento total de once millóns de euros.
