Os camioneiros do carbón bloquearon de novo os accesos á central térmica das Pontes. A protesta, que se iniciou de xeito sorpresivo a última hora da tarde deste xoves, será de carácter "indefinido", segundo manifestou o presidente do colectivo de transportistas, Manuel Bouza 'Cholo'. "Estamos fartos de esperar", aseverou, esixindo unha vez máis "unha transición enerxética xusta" e solucións a un problema que se dilata no tempo.
Nesta ocasión, os camioneiros contan co respaldo do Concello, Cohempo, Seara, sindicatos, comité de empresa e Abrente, segundo explicou o presidente, quen insistiu en que esta vez non se moverán ata que non consigan "unha resposta clara e real".