Xa van máis de dous meses desde que Vilalba entrou no nivel máximo de restricións polo covid-19 e a situación desde entón, lonxe de mellorar, segue empeorando, e esta vez a un ritmo moi alto. Por iso, os veciños agradecen todos os cribados que se poidan facer para tratar de acoutar canto antes unha situación á que non terminan de atoparlle unha explicación.
"Non sei se é que non facemos ben as cousas...", reflexionaba a empregada dunha tenda de roupa local á saída do cribado voluntario con PCR ao sector servizos que se realizou este venres pola tarde no pavillón municipal, ao que acudiron 550 persoas. A este uniuse outro, con 65 test de antígenos, que propuxo o Sergas pola mañá aproveitando a cita vespertina e que se realizaron a membros de distintos colectivos.
"Parece que houbo un pouco de relaxación, de ver que todo ía máis ou menos ben non verán, e en setembro e outubro era en plan como que non pasaba nada. E agora coa chegada do inverno, as matanzas, as comidas de Nadal... imos subindo", apuntou Baruk Domínguez, da escola de música Esmuvi, que vía este cribado "moi necesario".
María Teresa Teijeiro, empregada dunha gasolineira, apuntaba pola súa banda que o descoñecemento que hai sobre este virus fai que custe explicar como evoluciona ás veces a situación. "Como isto é de novas, non sabemos moi ben a que aternos", afirmou, á vez que destacou que "cantas máis probas se fagan, mellor, máis resultados teremos e antes sairemos desta", unha opinión que compartía o cociñeiro Miguel Ángel Díaz, que ve no cribado do xoves "unha boa opción para ir descubrindo posibles focos".
E así, entre nervios e dúbidas, con cinco mesas para dar volantes e outras cinco para facer test —unha sexta era para os de antíxenos—, fóronse completando as PCR, cun ritmo constante e fluído grazas a unha boa coordinación e organización, coa axuda de Protección Civil e Cruz Vermella.
Os voluntarios agradeceron tamén a amabilidade dos sanitarios, que ao acabar daban resposta á súa dúbida máis imperioso: os resultados en 24 ou 48 horas. Toca unha fin de semana de esperas.
PRIORIDADE EN VACINAS. Vilalba Aberta pedirá no próximo pleno que o Concello inste "con carácter de urxencia" á Xunta a que as empregadas do SAF sexan consideradas persoal sanitario en primeira liña e, así, inclúanse de forma prioritaria nos plans de vacinación de covid-19. Solicita ademais que, ata entón, auméntese a periodicidade das PCR .
Os casos activos eran este venres 170, fronte aos 137 do mércores.
