O expresidente do CD Lugo e candidato do PP á alcaldía da Pastoriza, José Bouso, preséntase cun equipo renovado "multidisciplinar e comprometido" aos comicios municipais do mes de maio, unha lista que está integrada por oito homes e seis mulleres.
Despois do coñecido empresario, ocupará o número dous da candidatura Digna Iglesia, traballadora do Concello e procedente da parroquia da Regueira, e á que a seguirá Alberto Legaspi, comercial natural de Aguarda.
Luís Miguel Iglesias, xerente dunha empresa informática da parroquia de Saldanxe, será o número catro da candidatura popular, onde a quinta posición está ocupada por Yésica Rielo, gandeira de Álvare.
A directora dunha multinacional téxtil natural da Regueira, Rocío Rigueiro, será a seguinte nunha lista que completan o empresario Manuel Ángel Silva; o gandeiro e agricultor ecolóxico Diego López; a perruqueira Eva Gacio; o exfuncionario da Xunta Carlos Lanzós e a auxiliar de enfermería Clara Reigosa.
Bouso explicou que o proxecto do PP para A Pastoriza se centrará en apoiar "os distintos sectores produtivos, sen esquecernos da dotación de servizos, o fomento do deporte, a cultura e a actividade social, así como a potenciación dos nosos recursos e do patrimonio histórico do municipio pastoricense".
