Os bombeiros do parque comarcal de Vilalba auxiliaron este sábado ao mediodía a dous anciáns que, ao parecer, pasarían varios días tirados no chan da súa vivenda de Bereda, na parroquia vilalbesa de Árbol.
Foron os veciños da parella os que deron a voz de alarma, xa que levaban días sen vela. Ao achegarse á casa, os presentes manifestaron que eran capaces de ouvir ás dúas persoas no interior do inmoble, pero que non os vían.
Ademais, intentaron acceder ao interior do domicilio familiar e, aínda que a porta de entrada foi aberta con relativa facilidade polos propios veciños, si foi necesaria a intervención dos bombeiros para desbloquear unha segunda porta que daba acceso ao piso superior da casa, onde se atopaban os anciáns.
Todo parece indicar que un deles sufriu un contratempo fai uns dous días que lle fixo esborrallarse no chan e o outro, ao intentar axudalo, tamén se precipitou ao piso. Ambos se atopaban en dúas habitacións diferentes da primeira planta e sen poder levantarse por si mesmos para pedir auxilio.
Ao lugar do suceso tamén se trasladou a Garda Civil, unha ambulancia medicalizada e un médico que lles realizou unha exploración para valorar como se atopaban as vítimas. Ambos foron traslados ao Hula.
DESAPARECIDO. Pola súa banda, efectivos de Protección Civil localizaron en bo estado ao veciño de Insua de 92 anos, Dionisio G.F., tras pasar a noite desaparecido. O operativo de procura, que contou tamén con Policía Local, Garda Civil e varios veciños, atopouno ás 11.30 horas nunha leira a uns 150 metros da súa casa, en Rebordaos.
O nonaxenario, que é totalmente autónomo, pasou a tarde arranxando un terreo, pero á hora para cear non regresou, polo que os seus familiares deron a voz de alarma. O home caería detrás dun valado que había nun prado, e alí pasou a noite.
A información facilitada por unha veciña, que asegurou que o seu fillo vira ao home a uns 40 ou 50 metros do cruzamento que conduce á súa casa e dirixíndose a esta pouco logo das 20.30 horas, foi crucial, xa que foi o punto de partida para empezar a buscar.
Ao lugar desprazouse a alcaldesa de Vilalba, Elba Veleiro, que realizou, na súa condición de médico, a primeira valoración a Dionisio G.F., que aínda que se atopaba consciente e en bo estado, foi trasladado ao hospital de Lugo.
