Aínda que para moitos o ocorrido foi unha sorpresa, outras voces atrevíanse a apuntar que algo así "víase vir", lamentando que non se puidese ter evitado. "A xente dicía que el era malo para ela", comentaba un familiar de Mari, á que os coñecidos definiron como "boa rapaza". As opinións sobre o presunto asasino non son tan benévolas. "Complicado" ou "difícil" son algunhas das palabras utilizadas para referirse a el, e incluso houbo quen recordou que hai tempo acusárono de cortar as rodas de varios vehículos dos veciños.
Coñecidos
Ambos eran persoas coñecidas en Vilalba. Mari foi empregada hai algúns anos nun supermercado. Agora xa non traballaba, afectada de problemas de saúde. Filla única, o seu pai era o seu familiar máis próximo, tras perder á súa nai hai tempo. Pola súa parte, Manolo, que ten cinco irmáns, levaba unhas dúas décadas na fábrica de queixos de Abadín, onde traballaba de luns a venres. Fontes da empresa manifestaron o seu pesar polo ocorrido: "Estamos sen palabras", indicaron, precisando que esta última semana acudira ao seu posto "coma sempre".
