Os barrios de Castiñeira, Seselle, Castrillón e Piñeiros, todos pertencentes á parroquia pastoricense de Bretoña, celebrarán cinco días de festa en honra a San Cosme e San Damián, uns festexos que foron organizados por unha comisión formada por Rubén e María José González Galego e Nerea e Lucía Regueiras González.
Unha verbena animada por Dani Pardo, o Grupo Beatriz e unha discoteca móbil abrirá hoxe os festexos, mentres que mañá recollerán a testemuña Ángel América e o dúo Pegaso.
Mañá sábado, no que a misa na capela de Castiñeira será ás 13.00 horas, a comisión de festas quere recuperar a tradicional poxa que antigamente se organizaba nas festas, polo que animan aos veciños e a calquera persoa interesada en colaborar a doar produtos e que estes se poidan poxar entre os asistentes.
Nesta xornada tamén está prevista outra novidade, a disputa dun torneo de birlos a partir das 18.00 horas, recuperando outra das antigas tradicións das festas da parroquia.
O domingo 24 a misa será ás 14.00 horas e despois o dúo Imaxine animará unha sesión vermú que clausurará o primeiro fin de semana de celebracións.
O sábado 29 serán Ana Sánchez e o dúo Matices quen animarán unha xornada con misa ás 12.00 e unha gran comida veciñal ás 14.00, servida polo cátering Boa Vista. O custo do ágape, no que se esperan unhas 150 persoas, é de 25 euros para os adultos e 15 para os nenos. Para apuntarse pódese chamar ao 650.29.36.91.
As festas de San Cosme e San Damián despediranse o domingo 30 coas actuacións de Ciclón, Tropical, Xílgaros de Lugo e José Manuel de Abanico.
Desde a organización mostran o seu agradecemento a todas as persoas que colaboran para facer posible estas festas e recordan que a capela de Castiñeira estará aberta toda a mañá para quen queira pór o santo.
