A acampada reivindicativa dos traballadores das empresas auxiliares da térmica das Pontes chega este martes á súa primeira semana sen avances nin contactos por parte das administracións. Os afectados esixen á Xunta de Galicia e ao Goberno central que os escoiten e que convoquen reunións con eles para negociar e afrontar unha situación difícil que podería traer nos próximos días moitos despedimentos, alertan, á vez que esixen unha transición que realmente sexa xusta.
Con quen si tiveron contacto o luns foi con Endesa, pero da reunión, aseguraron, tampouco saíu ningunha solución. "Hoxe tivemos reunión con Endesa por fin pero sen avances. Quéixanse de que non hai axilidade, que xa presentaron a principios de mes toda a documentación requirida para o peche, que está a exposición pública, e que a única alternativa para poder darnos garantías de emprego é ter o compromiso de que hai uns prazos fixos para o desmantelamento da central", indicaron desde os sindicatos ponteses.
A garantía de emprego da eléctrica coa industria auxiliar chegou ao seu fin o 30 de xuño e desde moitas das empresas xa se están expondo traslados de persoal a outros puntos de España e despedimentos. "Espera un mes duro", indican desde os sindicatos, e reclaman "compromiso" por parte das administracións para evitar que sexan os traballadores os que paguen co seu emprego a transición enerxética.
Desde os sindicatos alertan que sen garantías de emprego aumentarán os traslados e os despedimentos dos traballadores pronto
Ata a acampada reivindicativa, que ten carácter indefinido, achegouse este luns a portavoz do BNG, Ana Pontón, e outros membros do partido nacionalista, para mostrar o seu apoio aos traballadores e esixir tamén ás administracións que actúen.
"Tanto a Xunta como o Goberno central como Endesa están deixando tirados aos traballadores das auxiliares. Estamos vendo que unha vez que finalizou o prazo das garantías de emprego as administracións néganse a reunirse cos traballadores e buscar unha solución e isto o que retrata é que ante un problema temos dous gobernos á fuga, xusto nun momento que o que se necesita é un compromiso real", valorou Ana Pontón, que aludiu a que o peche da térmica, segundo o último estudo que desenvolveron investigadores da USC, pode ter un impacto de 1.200 empregos.
A portavoz do BNG esixiu solucións "no curto e no medio prazo" e "alternativas", xa sexan a través de formación ou buscando medidas para xente máis maior, pero sobre todo "alternativas económicas que xeren emprego", e recordou que desde o BNG, que sempre defendeu a creación dun centro de almacenamento de enerxía para As Pontes vinculado á I+D+i para "ter un polo irradiador que non só xere enerxía senón actúe no ámbito da investigación enerxética, unha das cuestións de futuro", levarán este martes unha moción ao Parlamento galego respecto diso.
MÁS MOBILIZACIÓNS. Desde os sindicatos e a coordinadora das auxiliares barallan, ademais de continuar coa acampada que iniciaron fronte ao consistorio pontés o martes 6, incrementar as mobilizacións.
