A autopsia da nena Desirée Leal, quen foi achada morta na cama da casa da súa nai en Muimenta, conclúe que a pequena morreu asfixiada por opresión contra boca e nariz dalgún obxecto aínda por determinar que podería ser unha almofada, en base ao sangue achado na mesma, na escena do presunto crime.
Segundo confirmaron fontes próximas á familia, que tiveron acceso a un informe provisional do forense, esta sería a causa da morte da pequena.
Ademais, no corpo de Desiré atopáronse sustancias que indican que estaba a ser medicada, aínda que a súa presenza non é suficiente como concluír que a pequena falecese por mor dun envelenamento.
Este mércores cumpríanse dous meses do tráxico suceso que conmocionou Muimenta o pasado 3 de maio, cando a pequena Desireé, de sete anos, foi atopada morta na súa cama na vivenda que compartía coa súa nai e a súa avoa.
Máis de 60 días despois do fatídico suceso, a principal sospeitosa, a súa proxenitora Ana Sandamil, continúa na unidade da custodia de presos o Hula, á que foi trasladada desde o módulo de Psiquiatría logo de negarse a declarar e á espera de recibir a alta médica que a enviará a un centro penal. Está acusada dun delito de asasinato ou homicidio e, segundo fontes próximas, segue no hospital porque está a ser tratada dunha patoloxía.
