A Asociación Unificada de Gardas Civís de Lugo (AUGC) denuncia a problemática que está a sufrir a localidade de Vilalba e a súa zona de influencia, respecto da prestación de servizo por parte das patrullas de Seguridade Cidadá.
Por falta de efectivos, Gardas Civís de Postos de zonas como Guitiriz ou Baamonde desprázanse ata Vilalba para prestar servizo e apoiar aos compoñentes de Vilalba no referente á prestación de servizos como pode ser recepción de denuncias ou prestar servizo de seguridade no Cuartel de Vilalba.
Este tipo de prestación de servizo non ten precedente en toda a provincia de Lugo, o que está a crear malestar nos axentes e un desaxuste nas outras unidades que perde efectivos por derivalos cara á citada localidade.
A área de Vilalba é a zona onde máis carencia de efectivos hai, o que levou a deseñar distintos tipos de prestación de servizo para a zona, algo que os axentes destinados pola zona comprenden e acatan como profesionais que son, pero este tipo de servizos deben ser prestados con dignidade e calidade polos axentes que son designados para iso.
Para AUGC este tipo de servizos demostra unha vez máis que o despregamento territorial está obsoleto e abre outra vez o debate da unificación de unidades, que se está facendo sen pechar instalacións.
