A asociación Terra Chá Sostible presentou dúas denuncia ante a xefatura territorial da Consellería do Medio Rural de Lugo pola existencia de dúas plantacións "ilegais" de eucalipto que ocupan máis de 100 hectáreas en cinco municipios de Lugo, a súa comarca e A Terra Chá. Nun comunicado emitido este mércores, o colectivo sinala que estas plantacións, que atribúen á "falta de control" por parte da administración, cobren 64 parcelas de carácter agrario nos concellos de Begonte, Outeiro de Rei, Lugo, Castro de Rei e Friol.
A asociación advirte da "escaseza" de terras para os gandeiros por culpa deste tipo de plantacións "ilegais", que fan que as parcelas dedicadas á produción agrogandeira "sufran unha excesiva intensificación, con gran uso de pesticidas e emendas químicas que terminan contaminando as augas e acuíferos".
Así mesmo, a plataforma tamén denuncia a realización de tallas de carballos "para convertelas en terras agrícolas" á vez que parcelas dedicadas á produción agrogandeira "transfórmanse ilegalmente a eucalipto".
Neste sentido, Terra Chá Sostible considera que o "problema" co eucalipto e a falta de extensións para produción agrogandeira excede o ámbito "paisaxístico" e chega ao plano "ambiental e social" e encamíñase tamén a converterse "nun problema económico".
