A firma pontesa Arteixo Telecom, líder no sector da electrónica industrial, fabricará produtos israelís para defensa e seguridade que venderanse a toda Europa. A empresa, asentada no polígono industrial de Penapurreira, estreita lazos co país de Oriente Próximo e se alía coa firma Be1, que trasladará parte da súa produción ás Pontes, tal e como anunciaron onte nunhas xornadas de traballo nas que varias firmas israelís presentaron os seus patentes.
"Chegamos a acordos antes do inicio das xornadas. Descubríronnos a través dunha certificación que Arteixo Telecom ten do Ministerio de Defensa, a Pecal, que permite traballar no sector militar. Os israelís teñen unha serie de empresas de avanzadísima tecnoloxía e a idea é que nos convertamos é a súa partner industrial para toda Europa", explicou o presidente da firma pontesa, Rafael Valcarce, que adiantou que a pesar de que xa concretaron algúns produtos, non pode desvelalos por confidencialidade. Todos están relacionados co sector da defensa e a seguridade, con aplicacións tamén civís.
"Isto daranos un suplemento de carga de traballo, fabricaremos aquí os produtos que logo eles van colocar no resto de mercados", indicou o presidente dunha compañía que actualmente suma 120 empregados e que entre o xoves e este venres acolle as xornadas Tecnoloxías e solucións para defensa e seguridade, que serven de escaparate á tecnoloxía israelí máis punteira e que reúnen a medio centenar de participantes, tanto das forzas de seguridade como de empresas públicas e privadas.
Os israelís falaron dun flash que cega a delincuentes, unha pulseira antihackeo ou de como aplicar intelixencia artificial
"Arteixo Telecom simboliza o mellor da empresa galega, ese espírito emprendedor co que naceu hai varias décadas e que é capaz de superar retos como producir tecnoloxía desde unha esquina do mundo e ofertar produtos en colaboración con profesionais do sector da defensa e outras empresas punteiras. Desde o ámbito institucional, queremos aplaudir esta xornada e o labor magnífico de Arteixo Telecom", expresou o rexedor das Pontes, Valentín González Formoso, no arranque das xornadas. Tamén estivo presente o director de Xesgalicia, Fernando Guldris, que augurou que será o primeiro paso de moitos.
Illil Podliszewski, de Be1, falou dunha "cooperación estratéxica" con Arteixo Telecom e da importancia de que «logo de meses de traballo" poidan pasar parte da súa produción a Galicia. A firma, con sede en Israel, ten oficinas en Alemaña e Brasil.
ALGUNHAS PROPOSTAS. Representantes de varias empresas presentaron algúns dos seus desenvolvementos, moitos xa en uso en diversos países. Directivos de CTI falaron da tecnoloxía de análise de vídeo baseada en intelixencia artificial e das súas aplicacións -medir densidades de multitudes, contar vehículos, realizar recoñecementos faciais ou inspeccións de colectores nun porto-, responsables de LightGuard presentaron un flash cegador de luz non letal para neutralizar delincuentes, terroristas ou disolver manifestacións violentas. E a empresa Terafence mostrou IoT Cybersecurity Solution, que ofrece protección total ante posibles ameazas de hackeos, e o brazalete anti-hackeo, para protección de coches, portas ou caixas fortes.
Elbit Systems presentou solucións baseadas na acústica cando as cámaras de videovigilancia non son suficientes e hoxe desde Spire Cyber Division abordarán solucións de última xeración en ciberseguridad para o sector empresarial e bancario para evitar ataques e protexer datos.
