Un total de 17 membros das Unidades de Mergullo de Ferrol, Cádiz e Canarias, da Unidade de Mergulladores de Medidas Contra Minas e da Escola Militar de Mergullo realizaron nos últimos cinco días diferentes exercicios de desactivación de explosivos (Eodex-20) tanto na base da Armada en Ferrol como nas instalacións do Campo de Manobras e Tiro (CMT) de Santa Cruz de Parga, en Guitiriz.
Estas actividades buscan facilitar o intercambio de información e de distintas experiencias entre as distintas unidades especializadas na desactivación de municións e artefactos explosivos, un labor que no ámbito marítimo é competencia exclusiva da Armada.
Así, durante sesións como a programada esta semana os participantes repasan as distintas tácticas e técnicas de desactivado de explosivos, tanto nun ambiente convencional como no ámbito das municións NRBQ (Nuclear, Radiológica, Biolóxica e Química), así como de artefactos explosivos improvisados (IED). Os exercicios previstos durante esta concentración desenvólvense tanto a nivel terrestre como nun ambiente submarino.
Outro dos labores fundamentais destas xornadas de convivencia e formación é que as distintas unidades poidan compartir e avaliar os resultados obtidos nas desactivacións reais nas que tiveron que intervir. Por iso, os equipos participantes pon en común as operacións materializadas ao longo do último ano, coa finalidade de mellorar os procedementos que se empregan neste tipo de situacións.
Exercicios como o programado durante esta semana entre Ferrol e Guitiriz teñen como obxectivo prioritario elevar o nivel de adestramento do persoal especializado, ademais de fomentar a interoperatividad entre os distintos Equipos Operativos de Desactivado (EOD) cos que conta a Armada Española.
