O empresario mariñán Carlos Folgueira, O Rei das Tortas, ten a piques de finalizar as obras necesarias para a apertura da área de servizo que abrirá na autovía do Cantábrico xusto tras O Fiouco, no municipio de Abadín pero lindando co veciño de Mondoñedo. Segundo el mesmo explica, neste momento "a maior parte da obra está practicamente rematada. Témola lista a un 99 por cento e só nos falta algún trámite administrativo".
Esta área de servizo será a primeira que se instale na A-8 en unha gran cantidade de quilómetros, concretamente entre Xixón polo leste e Guitiriz polo oeste, o que converte a súa apertura nun feito importante para os condutores que utilizan esta vía de comunicación xa que na actualidade teñen que desviarse de forma notable para poder encher ou para facer un descanso en todo ese tramo.
O propio Carlos Folgueira explica que se trata dunha "aposta forte a nivel de investimento, pero penso que é algo que é necesario porque é un servizo e, por outra banda, estou convencido de que facendo as cousas con traballo firme e con humildade isto pode funcionar ben".
A gasolineira que leva está abanderada por Repsol, pero a dotación de combustible non será o seu único servizo. Disporá tamén dun supermercado Claudio Express e haberá unha cafetería e restaurante ademais dunha zona na que poder comprar os produtos da casa, de O Rei das Tartas, que disporá ademais dun pequeno espazo con recordos do pai do propio Folgueira onde poder facerse unha fotografía nunha zona moi especial.
SERVIZOS. Polo demais, haberá numerosos servizos pensados en exclusiva para os viaxeiros, como dúas terrazas, unha zona para duchas, unha área de lactación e incluso un parque canino para todas aquelas persoas que viaxen con animais e tamén queiran darlles a eles un descanso.
A iso engade Carlos Folgueira "unha terraza con vistas panorámicas que penso que chamará a atención porque é moi espectacular". En total, o empresario mindoniense xerará once ou doce postos de traballo algo que considera que tamén é reseñable para os veciños da zona de Abadín ou Mondoñedo.
