Unha empresa que ofrece cursos a domicilio de alfabetización dixital para persoas maiores é a proposta dun grupo de alumnos de primeiro do ciclo básico de Informática de Oficina do IES Lois Peña Novo de Vilalba dentro da iniciativa Miniempresas do programa Lanzadeiras Lugo, en cuxa quinta edición participan once centros con 18 proxectos.
Isaura Sánchez, Cristian González, Elena Lázare, Jaime Pernas, Samuel Alvariño e Hugo Fernández son os creadores de Ensina Avós, centrada en ensinar o uso das novas tecnoloxías, as redes sociais e internet a quen o desexe, principalmente persoas de avanzada idade.
Así, tras realizar un estudo de mercado e desenvolver a idea da empresa, crearon unha web cunha listaxe de 21 cursos, co seu temario, duración e prezo, entre outros datos aos que os usuarios poden acceder. "Tamén fixemos vídeos titoriais, ademais dous manuais, toda a papelería e os perfís da empresa en distintas redes sociais", explican os promotores.
Para validar este proxecto -que é unha parte indispensable en Miniempresas-, pensaron en dar un curso na residencia de maiores de Vilalba, en colaboración co ciclo de Dependencia que se imparte tamén no IES Lois Peña Novo. Este centro participa este ano en Lanzadeiras Lugo con outros dous proxectos máis.
