O foco de coronavirus de orixe familiar detectado a mediados da semana pasada en Vilalba, que se estendeu ao municipio veciño de Xermade e suma un total de seis positivos, está "controlado", segundo aseguran os alcaldes deses dous concellos.
A rexedora de Vilalba —onde o brote afecta a catro persoas—, Elba Veleiro, apunta que de acordo con datos trasladados desde a Consellería de Sanidade este luns todo continúa "igual". "Todo está moi controlado", di.
Segundo as súas palabras, a progresión do virus "foi mínima" dentro do círculo familiar afectado e o protocolo sanitario estableceu os contactos para facerlles a preceptiva PCR nos últimos días, das que todas "deron negativo". No entanto, Veleiro confirmou que aínda "hai xente en corentena preventiva".
Tamén o alcalde de Xermade, Roberto García, entende que "está todo baixo control" nese municipio, no que outras dúas persoas da familia, que participaron na mesma comida, deron positivo nas probas. Ademais, explicou que as persoas con Covid-19 "están confinadas nas súas casas" e sen "perigo de que se propague ao resto da poboación".
