O alcalde das Pontes, Valentín González Formoso, reclamou este luns un compromiso e maior implicación por parte do Goberno e da Xunta en atopar unha solución para o complexo eléctrico de Endesa emprazado nesta localidade, que é "o máis grande" de España.
En declaracións aos xornalistas tras manter unha reunión coa rexedora da Coruña, Inés Rey, o tamén presidente da Deputación Provincial recordou que esta central xerou moitos empregos ao longo da súa historia e dela dependen 650 familias de forma directa.
Unha vintena de alcaldes reunirase mañá coa ministra de Transición Ecolóxica, Teresa Ribera, para abordar a situación do complexo, que mobilizou tamén a empresarios, sindicatos e traballadores que esta tarde celebran unha asemblea ante unha semana de protestas pola paralización da actividade na central térmica.
"Sendo conscientes todos de que o carbón é un combustible en extinción", polo menos no continente europeo, abundou Formoso, ten "outras alternativas que se están estudando pero que necesitan do apoio político a nivel estatal e autonómico". O obxectivo da reunión de mañá é "confirmar ese compromiso político", resolveu.
Ademais, insistiu en que desde o Goberno está a escoitarse "tanto á empresa como aos responsables da zona, neste caso ao alcalde das Pontes, para atopar como paliar aqueles aspectos que afectan o carbón e aos custos de produción de enerxía".
"Froito do diálogo, estou convencido de que sairán as medidas oportunas, non só para que a empresa produza enerxía en condicións de mercado se non tamén garantir o futuro nesa zona", apostilou.