Os niños das avispas velutinas empezan a aparecer en pleno centro urbano da capital chairega, onde operarios municipais xa retiraron tres nos últimos días e atopáronse esta semana cun cuarto, e o de maior tamaño atopado ata agora, que se localizou na fachada posterior da mítica ferraxería Pontes, na Rúa da Pravia.
A retirada deste último estaba prevista para este martes pola noite —aproveitan que cando anoitece é cando se meten todas as avispas no niño para fumigarlas— por parte dos bombeiros, dado o difícil acceso que presenta. "Nós non temos medios. Ten mal acceso e moita altura", explicou un dos operarios, que recorda que xa eliminaron dous na contorna do bar Estudante e un terceiro nun balcón do edificio onde se sitúa a empresa Autos Llano. Todos eles, tiñan un tamaño un pouco maior que un ovo, asegurou.
No caso do niño aparecido na ferraxería Pontes, aseméllase a un balón de fútbol e foi un dos traballadores o que se decatou da súa presenza. "Uns clientes mataron o luns catro velutinas nunhas escaleiras que dan acceso a un altillo e xa pensei que aquilo era raro, que pasaba algo. E púxenme a buscar e xa o vin desde a fiestra da oficina", relata Arturo Bermúdez.
Acto seguido deu aviso ao 112 e falou cos operarios municipais, que apuntaron que se atopaban con moito traballo e baixo mínimos. "De catro que somos, dous somos alérxicos, polo que levamos tres días que non puidemos sacar niños", explicou un deles. Engadiu que actualmente hai uns oito pendentes de retirar en todo o municipio, a pesar de que "case hai unha persoa continuamente" realizando esta tarefa. Explicou tamén que, en comparación con anos anteriores, os niños de velutinas son "moi pequenos" e advertiu de que se pode dar o caso de que xa haxa algúns en árbores e que non se vexan polas follas.
