Unha veciña de Vilalba afronta sete anos de prisión por maltratar presuntamente a súa filla menor de idade, uns feitos que foron abordados este mércores no Penal número 2 de Lugo, nun xuízo que quedou visto para sentenza.
O escrito da Fiscalía recolle que a acusada "con ánimo de menoscabar a integridade física e psicolóxica" da súa filla impedíalle "de xeito continuado" entrar en casa cando chegaba do colexio, obrigándoa a refuxiarse nun "alpendre aínda que chovese ou fixese frío", un lugar no que tamén se resgardaba cando a acusada saía de casa coa súa parella e os seus dous fillos menores.
Ademais, o fiscal cre que a muller "incumpría de forma reiterada a súa obriga de coidado", ao non levala ás revisións médicas pertinentes nin a que lle puxesen as vacinas. Así mesmo, chegou a golpeala, segundo se desprende do escrito de acusación, onde se relata que unha vez lle deu un empuxón, o que fixo que a menor se dese un golpe na cabeza co marco da porta". A consecuencia diso sangrou abundantemente, pero non acudiu ao médico.
Noutra ocasión "tiroulle dos pelos e deulle labazadas", o que fixo que sangrase nunha cella, explica o fiscal, quen recorda que tampouco entón acudiu ao médico por esas lesións.
A defensa da muller pide a libre absolución da acusada
A muller chegou a perder a tutela da menor ata en dúas ocasións, tempo no que a nena estivo internada nun centro de menores e en acollemento provisional.
A acusada, que se enfronta a dous delitos de violencia habitual no ámbito familiar e a un terceiro de malos tratos no ámbito da violencia doméstica, negou os feitos e argumentou que as acusacións se debían aos ciumes que a nena tiña cara aos seus dous fillos menores, ademais da súa falta de adaptación á aldea.
A defensa da muller pide a libre absolución da acusada, mentres que o fiscal solicita sete anos de prisión e unha indemnización para a menor polo menoscabo ocasionado. No entanto, nas súas conclusións indica que se se aplica con carácter subsidiario o delito de abandono de deberes familiares, a pena reduciríase a seis meses.
