Adif, nunha resposta por escrito a unha batería de preguntas sobre o tren presentadas polo parlamentario de En Marea Miguel Anxo Fernán Vello no Congreso, asegura que o estudo dun posible variante que lles entregou aos técnicos do organismo un asistente á reunión informativa celebrada en Parga o pasado 21 de novembro é "tecnicamente inviable", ao estar deseñado "con pendentes imposibles para o ferrocarril".
Adif recorda que o proxecto para a supresión de tres pasos a nivel en Parga que se atopan en menos de 500 metros presentouse en xullo e informouse sobre as solucións de supresión estudadas -dous pasos inferiores peonís nos puntos 466/857 e 467/357 e un paso inferior de vehículos e peóns no 467/091 da Liña Palencia-A Coruña- nunha reunión celebrada a instancias do Concello.
Na resposta, Adif precisa tamén que se aceptou habilitar un aparcadoiro e unha beirarrúa de 500 metros cara ao campo de fútbol como obras complementarias e incide en que o proxecto busca eliminar "un risco tanto para os usuarios da estrada como para o ferrocarril". Ademais, recorda que hai dez anos xa non se materializou outra iniciativa presentada pola desaparecida Dirección Xeral de Ferrocarrís do Ministerio de Fomento pola oposición veciñal.
O proxecto de Parga foma parte do Plan de Supresión de Pasos a Nivel 2017-2024, que prevé eliminar un total de 36, 30 deles na liña Palencia-A Coruña e seis na de Monforte-Vigo, repartidos nun total de nove lotes.
Fernán Vello tamén se interesou polas actuacións previstas na liña Ourense-Monforte-Lugo, sobre o que se lle precisa que o 7 de febreiro publicouse no BOE a licitación da subministración e transporte de balasto para a renovación do citado tramo, cuxas ofertas se abrirán o 21 de marzo, coa previsión de iniciar as actuacións "no segundo semestre de 2019" e finalizalas no 2021.
Ademais, detállase que está en redacción "o proxecto de renovación total do tramo", que inclúe variantes nos Peares, Canabal e Rubián -estas non son competencia de Adif- e suma un investimento de 43 millóns. Tamén se detallan outra serie de actuacións para suprimir pasos a nivel, mellorar infraestruturas, a construción dun novo túnel en Oural, reparar 23 pontes ou electrificar a liña ferroviaria Monforte-Lugo.
