Un xogador do equipo de veteranos de Montouto -con iniciais F.C.C-, no municipio lucense de Abadín, aceptou este xoves unha pena dun ano e seis meses de prisión por propinarlle unha puñada na boca a un árbitro que lle sacou cartón amarelo no transcurso dun encontro.
O xuízo quedou visto para sentenza na Audiencia Provincial de Lugo despois do acordo alcanzado entre a defensa e o ministerio fiscal, que inicialmente pedía tres anos e medio de cárcere para o acusado e unha indemnización para a vítima de 2.500 euros.
Finalmente, o Ministerio público tivo en conta a atenuante de reparación de dano, dado que o acusado consignou 2.767 euros para indemnizar á vítima, así como a de dilacións indebidas, de modo que modificou as súas conclusións provisionais e rebaixou a pena de cárcere a un ano e seis meses.
De acordo co escrito de acusación, os feitos sucederon o 11 de xaneiro de 2014, sobre as cinco da tarde, cando se estaba disputando o partido de fútbol de veteranos entre o Montouto, equipo no que militaba o acusado, e o Lambruxos, de Sarria.
Nun momento dado, o árbitro do partido sacoulle un cartón amarelo por un lance do xogo, ao que o acusado respondeu cunha "forte puñada na"boca , que lle provocou varias lesións. De feito, a causa do golpe, o árbitro perdeu unha peza dental.