O Concello de Abadín recuperará o próximo 5 de marzo Expogrelo logo dun ano de parón debido á situación sanitaria. E farao cun programa similar ao anterior á pandemia.
"Tería que ser a decimosétima edición da feira, pero será a décimo sexta", explica o rexedor de Abadín, José María López Rancaño, que avanza que contan coa participación de 15 produtores na cita co manxar verde por excelencia, recoñecido coa IXP Grelo de Galicia.
"O noso obxectivo é recuperar unha feira que é importante para Abadín e tratar de volver á normalidade", di o rexedor chairego, que indica que o evento gastronómico desenvolverase, como é habitual, no campo da feira de Gontán en varias das naves, que complementarán a oferta de postos con outros situados en espazos abertos.
O que non se organizará este ano aínda será
Haberá tres premios para as cestas mellor decoradas
Expogrelo arrincará ás 9.30 horas coa asignación das casetas e a numeración das cestas de grelos e media hora máis tarde será a apertura oficial do recinto feiral. Por unha banda estarán os produtores de grelos, por outro os postos de artesanía e noutra nave instalarase a degustación dos grelos e o tradicional cocido, que arrincará a partir das 12.30 horas.
"Tamén virá o posto do polbo, porque haberá feira normal fóra", confirma o rexedor de Abadín, que recorda que o programa deste ano mantén outro dos grandes clásicos, o concurso de cestas.
O certame repartirá tres premios, de 50 euros, 30 e 20, respectivamente, entre as cestas mellor decoradas —os galardóns repartiranse a partir das 14.00 horas—. Pero a maiores, todos os produtores que asistan á feira recibirán "un agarimo" de 50 euros para recoñecer o seu traballo e agradecer a súa participación no evento.
Máis de 4.000 caixas
"O ano pasado vendéronse moi ben e os grelos de Abadín foron para toda España", confirma López Rancaño, que fala de envíos a Andalucía, a Cataluña, a Madrid ou ao País Vasco. "Enviábanse todas as semanas, os martes e os xoves, unha media de 350 caixas", di o rexedor de Abadín. En cada caixa van entre tres e catro feixes de grelos, cada un dun quilo aproximadamente, e comercialízanse a dous euros cada un.
Envíos nunhas horas
O Concello encárgase do envío, de pagar os portes e as embalaxes. "Os produtores tráenos á nave de Gontán ao mediodía, vén a empresa de transporte e á mañá seguinte xa están en destino", di o alcalde.