Algo máis de 200 vehículos pesados tomarán as rúas das Pontes este sábado, día 26, para celebrar unha nova edición da Festa do Camioneiro, unha cita que pretende unir a un sector que soporta centos de empregos na localidade, entre os camións do carbón e os de mercancías de moitas empresas.
A cita, que xa cumpre 18 edicións, incorpora este ano novidades, como os postos de venda de recambios e rodas, que se situarán nunha carpa no centro da localidade. Ademais, as celebracións prolongaranse ao domingo, xa que se manterán os postos de venda e organizaranse varias charlas sobre o mundo do transporte na Casa Dopeso. Serán pola mañá e centraranse en temas como os amarres de mercancía ou a nova lexislación do tacógrafo.
"Virán camións das Pontes, Vilalba, Ferrol, Ortigueira, Moeche, Pontedeume ou A Coruña, do carbón e de estrada, e todos os que se acheguen serán benvidos", enumera Manuel Bouza, Cholo, presidente da Asociación de Transportistas do Carbón, promotora da cita en colaboración co Concello.
A pesar de que este ano haberá actividades durante dúas xornadas, o día grande será o sábado. Os camións concentraranse no barrio da Casilla a partir das 9.00 horas e ás 10.00 iniciarán o seu percorrido polas principais rúas do centro urbano.
Ás 13.00 horas está prevista a misa na Praza de América, na que se recordará a algún compañeiro falecido, e despois celebrarase unha sesión vermú e unha multitudinaria comida no patio do colexio Santa María. Xa hai inscritas máis de 500 persoas.
"Na comida faranse sorteos de agasallos e unha pequena homenaxe a catro compañeiros que se xubilarán este ano", di Cholo, que indica que estará o presidente de Fegatramer, o colectivo que engloba a todas as asociacións de transportistas de Galicia.
Pola tarde, os actos continuarán con exhibición de coches de rallye e de karts no Canal IV, onde tamén haberá triciclos para nenos. Ao longo de todo o día haberá exposición de vehículos antigos e photocall e pola noite está prevista unha gran verbena.
"Os camioneiros son uns dos motores máis importantes da nosa economía, trátase dun sector estreitamente vinculado á nosa vila, os camións forman parte da nosa paisaxe e esta celebración é unha homenaxe a un colectivo vital", indica a edil de emprego das Pontes, Ana Pena.
