A Xunta solicitou ao Estado o peche cautelar das covas, arcos e corredores da Praia das Catedrais, en Ribadeo, despois de detectar risco de caídas e desprendementos de bloques ou pedras que suporían un "grave" perigo para "a seguridade das persoas". A Consellería de Medio Ambiente adoptou esta medida tras analizar as conclusións dun estudo encargado á Fundación da Enxeñaría Civil de Galicia sobre o estado do monumento natural despois do accidente ocorrido no mes de marzo, cando faleceu unha turista de Valladolid á que lle caeu unha pedra encima.
Após as visitas realizadas á praia polo equipo investigador, o informe preliminar determina que este perigo de caída de material, conforme sinala a Consellería de Medio Ambiente, é "maior" en xeral baixo as covas, os corredores e os arcos litorais, zonas que coinciden coas de maior afluencia de visitantes. Por iso, o departamento autonómico formulou esta solicitude ao Estado, a administración competente en dominio público marítimo terrestre.
É o Estado, e máis concretamente o departamento competente en materia de costas, quen pode adoptar as medidas de policía preventiva necesarias para garantir a seguridade
Así, a Xunta lembra que a Lei de Costas atribúe á Administración estatal a protección do dominio público marítimo terrestre co obxectivo de asegurar tanto o mantemento da súa integridade como o seu uso público e os seus valores paisaxísticos. Por este motivo e atendendo á distribución de competencias entre administracións, a consellería solicitou por carta ao Ministerio de Agricultura e Pesca, Alimentación e Medio Ambiente que proceda a pechar o acceso ás zonas de praia máis sensibles a posibles desprendementos, tal e como aconsellan os técnicos.
Ademais, a directora xeral de Patrimonio Natural, Ana Díaz, informou desta medida ao alcalde da localidade, Fernando Suárez, nunha reunión mantida este mércores e na que tamén participaron o xefe do servizo provincial de Costas, José Miguel Estevan.
CONCLUSIÓNS "PRELIMINARES". O departamento que dirixe Beatriz Mato sinalou que as conclusións sobre o estado actual das Catedrais son aínda "preliminares" polo que "haberá que esperar" a que o estudo da Fundación da Enxeñaría Civil de Galicia estea máis avanzado para "poder dispor dunha caracterización xeolóxico-xeotécnica de todo o monumento natural". En todo caso, mentres non se dispoña do estudo definitivo, a Xunta considera que "o máis adecuado" é pedirlle ao Goberno do Estado a adopción das medidas oportunas para garantir a seguridade das persoas e, entre elas, se procede, a prohibición de acceso ás covas, arcos litorais e corredores da praia de forma provisional.
Por último, a Xunta destacou que as súas competencias nesta praia limítanse á protección dun monumento natural desde o punto de vista ambiental e cun obxectivo conservacionista, co obxectivo de preservar este espazo de posibles agresións e evitar a súa deterioración. "Neste sentido, é o Estado, e máis concretamente o departamento competente en materia de costas, quen pode adoptar as medidas de policía preventiva necesarias para garantir a seguridade dos posibles visitantes; e de forma subsidiaria, o Concello de Ribadeo, como administración responsable en materia de seguridade pública", incidiu.
