A Asociación de Xogos Tradicionais de Muimenta celebra este domingo, día 7, a duodécima edición de Xotramu, pero será a través das redes sociais, unha alternativa á súa cita anual na que buscarán "poñer de manifesto e visibilizar a importancia do xogo na vida das persoas para facer comunidade lúdica", segundo aseguran. Baixo o cancelo #familiaXotramu, irán dando a coñecer as persoas achegadas á entidade e así tamén destacar "os valores que se foron transmitindo ano tras ano" nas celebracións de Xotramu.
Así mesmo, Natalia García, voluntaria do colectivo, tamén puxo o seu gran de area pintando diversos xogos de Tecendo Brincadeiras nas rúas de Muimenta para que "o xogo siga visible nestas datas", apunta sobre un proxecto que está a desenvolver ao longo desta fin de semana xunto a outros membros da asociación.
Dende Xotramu agradecen a implicación de voluntarios, colaboradores, compañeiros e veciñanza, "imprescindibles en calquera das edicións", engaden, ao tempo que desexan conmemorar o decimoterceiro aniversario con máis ganas ca nunca.
