O Primo de Banksy reapareceu en Lugo cunha nova obra, apenas mes e medio despois do polémico borrado do seu grafiti do Quixote pintando a Dulcinea nunha casa do adarve da muralla. Agora, o activista social actuou no barrio da Tinería, concretamente nun dos solares abandonados ao pé dun pazo a medio derruír ao que se accede pola Rúa Falcón.
Nesa ubicación, o artista viaxou ata a Revolución Francesa para pintar ao revolucionario Marat e preguntarse, precisamente, "que foi da revolución?".
A obra do Primo de Banksy bebe directamente do cadro La muerte de Marat, no que o seu amigo, o pintor francés Jacques-Louis David, plasmou o asasinato do líder revolucionario francés. Marat, moi próximo á facción dos xacobinos. foi apuñalado supostamente pola girondina Carlota Corday cando estaba na súa bañeira.
[La muerte de Marat, de Jacques-Louis David]
