Hai quen, pese á súa xuventude, ten as cousas moi claras, e o vilalbés Ismael Francos, cos seus 15 anos, é un claro exemplo desta afirmación. Unha das súas ilusións desde «sempre», tal e como el mesmo di, era ir estudar fóra e o próximo curso poderá cumprir o seu soño grazas ao programa de bolsas de estudo da Fundación Amancio Ortega, que lle permitirá realizar o seu primeiro ano de Bacharelato en Canadá.
Para Ismael, recibir a noticia foi «unha ledicia moi grande». «Ves o teu nome aí, entre os selecionados, e pensas que felicidade!», asegura cheo de ilusión ao saberse un dos 80 estudantes galegos -hai un total de 500 bolsas para toda España- que pasará dez meses mellorando o seu nivel de inglés e coñecendo outras culturas, que son os obxectivos que persegue a fundación a través destas axudas.
Este vilalbés soubo delas a través de internet cando aínda tiña 14 anos e, cando veu en que consistían, xa o tivo claro. «Comenteino na casa, pedinlles permiso aos meus pais para facer a solicitude e empecei a mover todo» tras ler os requisitos -ter unha nota media de 7 e, en inglés, de 8, entre outros- e ver que os cumpría todos, explica.
Este mozo de Vilalba, que vivirá dez meses cunha familia de acollida, afronta a experiencia «con moitas ganas de aproveitala»
No inicio desta aventura non estivo só, senón que outros dous compañeiros da súa clase tamén se inscribiron para realizar as probas de selección.
A primeira celebrouse en Santiago e consistía nun exame de inglés escrito, centrado na gramática e cun listening. «Cando saíron as listas dos que pasaban á seguinte, estábamos de excursión en París, os tres moi nerviosos por saber que pasaría», recorda. Só el accedeu á segunda e última, na que tivo que realizar por Skype unha presentación oral sobre un tema e responder unhas preguntas que lle facían.
Finalmente, foi un dos seleccionados e afronta esta oportunidade «con moitas ganas de aprender, de ver sitios, de vivir a experiencia, que é única e hai que aproveitala».
A bolsa cobre a totalidade do curso escolar en Canadá ou Estados Unidos -Ismael decantouse polo primeiro, porque «sempre me gustou máis»-: viaxe, taxa de escolarización, convalidación de estudos, aloxamento e manutención nunha familia de acollida, seguro médico e de accidentes e o apoio continuado durante os dez meses de estancia, que estarán integramente no país eloxido.
En canto á distancia e o tempo que pasará lonxe da familia e amigos, este mozo vilalbés recoñece que é algo que lle pon «algo triste», pero que «seguro pasará rápido». «Son dez meses que vas aproveitar moito. Unha oportunidade que igual nunca na vida a volves ter. A opción de volver sempre a tes; a de quedarte, xa está porque estás alí; pero a de ir, non sabes se a vas ter de novo», explica cunha claridade de ideas que sorprende a quen o escoita.
Sobre o que espera atoparse en Canadá en canto a estudos, considera que «alí valoran máis o traballo persoal, o esforzo que fagas, non tanto os exames». E a comunicación en inglés, de inicio, non lle preocupa. «Vou a clases particulares e vexo series e películas en versión orixinal. Acostumas o oído e faise máis fácil», explica.
De momento, segue a recibir felicitacións pola experiencia que vai vivir a partir de setembro e xa serve tamén de inspiración para outros alumnos do IES Basanta Silva. «É unha pena que non informen máis deste tipo de bolsas. Algúns rapaces xa me preguntaron como fixera», apunta.