FOI UNA VITORIA rotunda grazas ás 5.373 papeletas que acabanaron nas urnas montadas este domingo nas 26 mesas electorais de Monforte. Por se alguén aínda non se decatou foron a parar ó PSOE que lidera José Tomé Roca desde o ano 2003. Eufórico polos resultados, pero, asegura, cos pés no chan, di que non aspira a máis nada que a traballar polo municipio, que a presidencia da Deputación de Lugo, como algúns pensan, non é o seu obxectivo.
De verdade, esperaba os resultados obtidos?
Contabamos ter uns bos resultados, entre nove e dez concelleiros, polo que non foi unha sorpresa lograr once. Con todo, non deixa de enchernos de ledicia que os monfortinos, de forma tan maioritaria, apoiasen o noso proxecto de futuro para o municipio e o traballo realizado durante o últimos catro anos. Se nos remontamos ás primeiras eleccións municipais, que arrincaron en 1979, non houbo nunca unha maioría absoluta tan sólida. Celestino Torres foi o que máis votos conseguiu no seu día, co 61,9 por cento dos emitidos. Nós alcanzamos nestes comicios o 64,7. O crecemento exponencial foi tremendo, pois crecemos en concelleiros un 83 por cento. Acórdese de que tiñamos cinco e agora once.
Foi capaz de dixerir tales resultados, tales cifras?
O meu grupo asumiunas con normalidade. Estamos contentos, si, pero somos xente práctica. Seguiremos traballando para dar solucións aos principais problemas de Monforte. Se nos últimos catro anos así o fixemos a pesar da dura oposición que sofrimos, de acoso e derribo, a partir de agora as cousas cambiarán. É algo que poderán comprobar en nada os veciños.
Quero deixar claro que non me propuxen para o cargo e que ninguén mo pediu, pero estou ao servizo do PSOE
Penso que xa ten en mente ás primeiras accións de goberno do novo mandato.
O primeiro que farei será sacar adiante os orzamentos municipais para o presente exercicio económico, os que tombou a oposición meses atrás, para cumprir coas asociacións que operan no municipio e que dependen moito das subvencións locais para o seu funcionamento. A partir de aí traballaremos para aprobar o plan especial de protección do casco antigo, iniciar os estudos do xeral de ordenación municipal, levantar unha nova ponte no Paseo do Malecón para facer peonil o medieval e seguir mellorando tanto a trama urbana como a rural, sen esquecernos dos servizos sociais, por suposto.
Falamos de rodete puro e duro pola maioría absoluta ou dun goberno que escoite aos veciños?
Creo que está demostrado que escoitamos aos veciños e que demos solucións ás súas principais inquietudes. Doutra maneira non conseguiríamos eses 5.373 votos. Penso que o traballo foi bo e seguriemos nesa liña.
Escóitanse voces de que pretende postularse como presidente da Deputación de Lugo. É certo?
Quen me coñece sabe que a miña principal preocupación, ao igual que o meu interese, é Monforte. Levou moitos anos tentando chegar á alcaldía para desenvolver un proxecto para que a capital da Ribeira Sacra teña o que se merece. Ese é o meu empeño. Por outra banda, creo que o presidente da Deputación de Lugo durante o últimos catro anos, Darío Campos, fixo un excepcional traballo e, polo demais, no que se refire ao futuro do organismo provincial e a súa presidencia, teño que dicir que se trata dunha decisión do partido.
Descártase como posible presidente?
Estou e estarei ao servizo do PSOE. Quero deixar claro que non me propuxen para ocupar ese cargo e que ninguén mo pediu. Insisto en que se trata de algo que polo momento non toca. Primeiro haberá que elixir aos deputados provinciais da nosa formación e logo designar a alguén, consensuado, para que estea á fronte da Deputación. Non quero ser pesado, pero este é un tema que a día de hoxe non me preocupa. O que queróo é poñer en marcha Monforte cun un proxecto de futuro.