A asociación cultural pastoricense A Chaínza empeza a quentar motores para celebrar o 21 de xullo a sétima edición do Festival da Chaira, un día de festa enxebre que este ano sumará ó seu cartaz de concertos e ó xa habitual campionato de billarda unha sesión vermú tradicional.
A paraxe natural da praia da Riboira acollerá un ano máis, e «xa van sete ininterrompidos», como recordan dende a asociación, un festival que leva o nome da comarca fóra das súas fronteiras, unha cita asentada que cada vez recibe máis visitantes dispostos a pasalo moi ben.
