Lugo Monumental propón a colocación de pasos elevados de peóns en todo o centro histórico e na Ronda da Muralla. A asociación entende que esa medida sería "positiva" tanto para peóns como para condutores, xa que contribúe por unha banda a facer patente a prioridade do peón sobre o vehículo, pero tamén axuda a reducir a velocidade e evitar accidentes e sancións.
Lugo Monumental recorda que o 73% dos atropelos de 2017 producíronse en pasos de peóns: "Psicoloxicamente é importante transmitir que o vehículo é o que invade o espazo do peón, e non ao contrario como sucede actualmente".
Ademais, a asociación, a través dun comunicado asinado polo seu presidente, Luis Latorre, explica que estas medidas mellorarían "notablemente" a accesibilidade, "un aceno de identidade lucense que quizá se estaba interpretando ao revés, pois se rebaixaban as beirarrúas en lugar de elevar os pasos de peóns".
Tamén consideran apropiados os semáforos de chan e os pivotes luminosos nos pasos de peóns para evitar descoidos.
Por todo iso, Lugo Monumental rexistra este luns un escrito no que solicita ao Concello de Lugo que se convertan en pasos elevados todos os de peóns do centro histórico e a Ronda da Muralla.