Unha muller septuaxenaria resultou ferida este luns ao ser mordida por unha cadela en Ferreirous, na parroquia de Fonfría, no concello de A Fonsagrada. A señora, natural de Asturias, atopábase no concello montañés pasando uns días nunha casa pertencente á familia. Os servizos de emerxencia recibiron o aviso por parte dun particular arredor das dez da mañá, e ata o lugar trasladáronse, ademais dos servizos sanitarios, unidades da Policía Local e de Protección Civil.
As feridas producíronse na parte inferior de ambas pernas e no brazo dereito da vítima, que foi trasladada incialmente ao PAC da Fonsagrada, onde posteriormente decidiron transferila ao Hospital Universitario Lucus Augusti (HULA).
A cadela, que segundo puido saber este medio, era dun veciño e de raza mastín, acababa de ter unha camada de cachorros, polo que se especula que a agresión puido producirse ao intentar protexelos. Con todo, a causa aínda non está confirmada.