Dispor de auga é unha das grandes preocupacións dos veciños e polo tanto, tamén daqueles que os gobernan. Por iso o Concello de Pol leva anos a desenvolver proxectos que eviten a falla de abastecemento, especialmente cando hai problemas de seca. E unha destas iniciativas vén de culminar agora co desenvolvemento da terceira fase para dotar de traída de auga municipal á parroquia de Caraño, da que se beneficiarán máis dun cento de veciños.
O alcalde polego, Lino Rodríguez Ónega, precisou que o investimento total deste proxecto superaría os 400.000 euros, se ben se puido aforrar unha parte deste custo ao realizar boa parte das actuacións con persoal do Concello e medios de titularidade municipal.
O Concello mellora o abastecemento das piscinas municipais e a varios barrios de Fraialde
A última partida consignada para esta actuación ascende a 72.000 euros, procedentes do plan único da Deputación Provincial de Lugo de 2019. Con este financiamento, o Concello de Pol levou a rede xeral de abastecemento a varios lugares da parroquia, completando un proxecto que se iniciaba hai xa uns anos coa compra dunha parcela localizada na serra de Caraño.
Estes terreos foron o lugar escollido para construír un depósito con capacidade para almacenar 150.000 litros de auga, así como uns catro quilómetros de rede cun diámetro de 12,5 centímetros e 25 atmosferas.
Rodríguez Ónega precisou tamén que os fondos procedentes da Deputación serven ademais para mellorar a rede de Mosteiro, o que supón unha mellora do abastecemento ás piscinas municipais e a varios barrios da parroquia de Fraialde.
Ademais de cubrir unha necesidade básica, como é o ter de agua de calidade nos fogares, os concellos tamén procuran manter en bo estado as estradas do seu municipio, para facilitar os desprazamentos diarios dos veciños. E nesa liña de mellorar as vías locais, o Concello vén de investir máis de 40.000 euros no acondicionamento de preto dun quilómetro de estrada na parroquia de Arcos.
Concretamente, os traballos serviron para mellorar as cunetas para facilitar a drenaxe e aglomerar a calzada nun tramo comprendido entre a canteira e a igrexa parroquial. O Concello pon 12.000 euros para esta actuación, que conta cunha subvención de 30.000 euros da Xunta de Galicia.
O alcalde de Pol salienta ademais a intervención realizada na parroquia de Valonga, xa que con ela se dá resposta a unha demanda veciñal. Lino Rodríguez precisou que o proxecto conta con dúas zonas de actuación, unha ao carón do cemiterio parroquial e outra na estrada que dá acceso aos montes de Panda.
O rexedor precisou que no contorno do cemiterio se acondicionou un espazo que permitirá incrementar a capacidade da zona de aparcadoiro, onde antes apenas había oco para un par de vehículos e agora poderán estacionar unha decena en batería. Con esta actuación tamén se lle dá un mellor acceso a varias fincas do lugar.
Moi preto deste punto, concretamente ao carón da rotonda, tamén se leva a cabo o acondicionamento da coñecida como pista do San Bernabé. O alcalde precisa que o estado da vía, tanto pola pronunciada pendente como polo pavimento, dificultaba ou incluso impedía o acceso de camións aos montes de Panda. Para facer posible esta obra, o Concello realizou unha permuta cun veciño do lugar.
O rexedor destaca a axilización de prazos e o aforro que supón o ter persoal e maquinaria municipal para executar obras
Rodríguez Ónega puntualiza que para sufragar estas intervencións o Concello de Pol conta cunha partida de 30.000 euros do plan único da Deputación, á que se lle suman ao redor de 35.000 euros procedentes das arcas municipais.
O rexedor destaca que para ambas actuacións se están a usar medios propios, tanto con persoal municipal como con maquinaria do Concello. Así, salienta a importancia que ten para un municipio pequeno coma o polego, e que non dispón de moitos recursos económicos, o contar con operarios preparados para acometer este tipo de intervencións, así coma cun amplo parque móbil municipal.
O alcalde recorda que desta maneira non só se aforran custos á hora de acometer proxectos que redundan en beneficio dos veciños, senón que tamén se axilizan os prazos de execución en actuacións que se consideran necesarias a nivel municipal.