martes. 16.07.2019 |
El tiempo
martes. 16.07.2019
El tiempo

Redactora de El Progreso na sección de Local. Especialista en información da área municipal. Tamén podes seguirme na miña conta de Twitter.

Tras gañar hai que gobernar

A complexidade da xestión municipal fai que cobre relevancia a elección dos futuros xestores

Un cidadán exerce o seu dereito a voto. AEP
Un cidadán exerce o seu dereito a voto. AEP

A EXPERIENCIA dille a Lara Méndez, alcaldesa de Lugo e candidata a volver a selo, que sen un equipo de xente leal e capaz é moi difícil xestionar, máis aínda un Concello como o de Lugo, con pouco persoal, conflitividade laboral, asuntos xudicializados e moito por facer, en parte por todo o anterior. Méndez traballou neste mandato cun equipo que non elixiu —con algunha excepción entre o persoal asesor— e seguramente non desaproveitará a oportunidade que agora ten de rodearse das persoas que considere que máis lle poden axudar. Aínda que a marxe de manobra sempre é menos da que se pensa, pola necesidade de atender ás distintas sensibilidades do partido —ao fin e ao cabo, é clave que o partido empuxe— e porque é difícil que determinada xente acepte embarcarse en política.

Neste intre, Méndez ten cousas máis urxentes sobre a mesa e é habitual que, como o PP, o PSOE apure os prazos para presentar a candidatura, pero é inevitable que comecen a barallarse nomes. Por necesidade e por hábito, non sería estrano que a candidata buscara na Deputación. É tradición que o segundo da lista sexa o potencial candidato á presidencia da Deputación, pero poida que esta vez se rompa polo interese xa manifestado de Darío Campos, alcalde da Pontenova, de continuar á fronte da institución. A oposición popular ve de segundo na lista municipal a Álvaro Santos, vicepresidente da Deputación e responsable do PP na provincia. No pasado foi candidato por Friol, pero deixou a portavocía municipal.

O nome podería encaixar porque o PSOE fai lista cremalleira e porque hai quen cre que, visto que tería o paso cortado para a presidencia da Deputación, Santos podería ter posta a vista na alcaldía no caso de que a esquerda impedira investir a unha Méndez imputada. Aínda que pode que as imputacións xa non sexan o cordón sanitario que eran, á vista de como resultaron algunhas e da reflexión que fai algún partido que foi vítima e verdugo, como o BNG.

Outro nome que esta semana saíu á luz  para a lista do PSOE é o de Óscar de la Parte, xefe de gabinete de alcaldía. CSIF focaliza nel a suposta estratexia que, segundo o sindicato, tería o goberno para non aprobar a RPT antes de maio, por interese electoral. Outros veno  na Deputación, a onde tamén podería chegar vía lista municipal.

Tamén o candidato do PP, Ramón Carballo, ten moi claro, ou iso di, que ten que facer unha lista "para gobernar". Cre que é o que debe condicionar a candidatura, porque opina que "non hai fichaxes que gañen as eleccións", o que non significa que non haxa que afinar cos nomes, "porque si pode haber quen che axude a perder", di.

Carballo coñece a experiencia de facer listas electorais, porque no pasado foi candidato na Montaña, e di que é "o máis complicado". Amosa sorpresa con algún nome que xa saíu, como o do veterinario Manuel Ernesto García Rodríguez, porque asegura —para quen queira crelo— que nin sequera na súa cabeza hai candidatos de momento. Dá algunhas claves para cando toque: o criterio será o seu, non será imprescindible ter carné, aproveitará a xente "que coñece o Concello por dentro" e os candidatos deben estar dispostos "a traballar noite e día no goberno". A boa política esixe un sacrificio moi forte, di, pero, en contra do que se poida pensar, asegura hai xente disposta a dar o paso.

A parroquia de Vox
Vox pode que teña tamén en Lugo máis parroquia da que algúns pensan, como no resto da Galicia, onde algún enquisador político lévase as mans á cabeza polo apoio que ve entre a cidadanía ao partido de extrema dereita. Vox aínda non ten estrutura en Lugo, pero está niso porque recibe chamadas de cidadáns para afiliarse e para ofrecerse a ir en listas. Quere concurrir na capital e nalgúns dos principais concellos.

Unha esquerda atomizada
Podemos, Eu e Equo negocian para presentar candidatura conxunta en Lugo, no marco do acordo nacional, pero semella difícil que as negociacións cheguen a porto. Xa en 2015 non foi posible unha confluencia da esquerda que teoricamente está á esquerda do PSOE. EU foi por un lado e Podemos acabou indo en Lugonovo, de onde saíu hai meses. A día de hoxe hai máis papeletas de que desta vez sexan tres.

Xea e a culpa é da alcaldesa
Levamos unha semana de xeadas —en xaneiro, ollo— e a culpa é da alcaldesa, pensarán algúns. Semella que está detrás de todos os males que sofre a cidade. Nas redes sociais xa se fan chistes, como que o primeiro neno nado en Lugo este ano cúlpaa do retraso no parto. Certo que a xestión municipal é deficitaria e que ás veces merecería máis autocrítica ou máis explicacións, pero o outro empeza a ser cómico.

Tras gañar hai que gobernar
Comentarios